خبر و تعليق الساخر

الخبر:
عُقد مؤتمر وطني تونسي رفيع المستوى في الأسبوع الماضي تمحور حول التدابير الواسعة التي تعتزم الحكومة اتخاذها لمواجهة أزمة البطالة وذلك في ظل تزايد عدد العاطلين بين خريجي الجامعات في تونس إلى قرابة الضعف في خلال العشر سنوات الماضية.

تقرير منى يحيى من تونس لمغاربية- 12-10-08
جدد مسؤولون في الندوة الوطنية حول التشغيل عام 2008 التأكيد على هدفهم المتمثل في استحداث مليون منصب عمل جديد في تونس بحلول 2016.
حددت ندوة التشغيل التي احتضنتها العاصمة التونسية الأسبوع الماضي بمشاركة عدد من السياسيين وخبراء القانون والمقاولات جملة من الإشكاليات والعوائق التي تحول دون التشغيل الكامل لكل القوى الحية. وقدمت مجموعة من التوصيات والحلول تهدف إلى التقليص من نسبة البطالة وتشغيل أصحاب الشهادات العليا. وتم إقرار هذه التوصيات في إطار ورشات العمل الأربع التي تناولت محاور التنمية الاقتصادية واستحداث مليون منصب عمل بحلول 2016.
وقال محمد الغنوشي الوزير الأول التونسي، في كلمته أمام المشاركين "إن التشغيل مازال يمثل تحديا أصبح يضم نسبا متزايدة من حاملي الشهادات العليا".
وأضاف "لكن هذا لم يمنع من تقليص نسبة البطالة من 15.6 إلى 14.1 في المائة وهذا يعتبر إنجازا".
وجاء في تقرير أصدره البنك الدولي قبل أزيد من عام أن البطالة في تونس بدأت تطال العديد من خريجي الجامعات فيها. وعند صدور التقرير في مارس 2007، بلغ عدد العاطلين من الخريجين الجامعيين 336 ألف شخص وهو نحو ضعف العدد قبل عشر سنوات من ذلك التاريخ.
وأكد خبراء التشريع بأن إيجاد فرص الشغل ينبغي أن يأتي ضمن النمو الاقتصادي بحيث يجب تحقيق توازن في السياسات لتلبية احتياجات التعليم والتدريب مع شروط المقاولات وسوق العمل حسبما قاله الغنوشي وذلك من أجل حفز الاستثمار وتسريع وثيرة النمو.
وأضاف الوزير "لا أرى لماذا لا تحقق تونس نفس الأداء كإيرلندا التي قلصت البطالة من 16 إلى 5 في المائة في غضون 20 عاما".
ودعت اللائحة الختامية للمشاركين في الندوة إلى توفير التجهيزات الأساسية لقطاعات الإنتاج وتنويع القاعدة الاقتصادية ونوعية التشغيل بالقطاع الخاص في الجهات ووضع خطة لسد الفجوة الرقمية على المستوى الجهوي لدورها الأساسي في دعم العمل والخدمات عن بعد.
وأحدثت الحكومة التونسية ما يقارب 600 ألف موطن شغل جديد خلال الفترة 2000-2007 وخلال السنة الماضية فقط تم إحداث 160 ألف موطن شغل جديد.
لكن بالنسبة للعديد من الشباب المتعلم العاطل فإن هذه الجهود تبقى دون المستوى المطلوب.
ويتوافد كل يوم لمكاتب التشغيل مئات من خريجي التعليم العالي، لكن قلة قليلة منهم يجد عملا عن طريق هذه المكاتب، وفي بعض الأحيان يتوفقون إلى إيجاد عمل وقتي، أو خارج اختصاصهم. وأصبحت شريحة واسعة من الشبان التونسيين، تفكر في الهجرة للدول الأوروبية.

وقد لا تقدم لجنة التوظيف عالية المستوى هذه حلا عاجلا لمعضلة الشباب العاطل مثلما يريدها هو بالرغم من الخطة الشاملة التي تقدمت بها لجان فرعية خاصة استهدفت استراتيجيات مختلفة لخلق مناصب الشغل.
و يقول وحيد بالهادي 30 سنة أستاذ تاريخ "ما فائدة التوصيات، إذا كنت أنا عاطلا عن العمل لمدة 4 سنوات. أنا بحاجة إلى عمل لا إلى توصيات".
وتتحدث إيناس، 27 سنة، عن تجربتها لمغاربية "أنا خريجة معهد صحافة، لكنني أعمل الآن في مركز للنداء، ولم أتمكن من العمل في تخصصي".
وتميزت الندوة بمشاركة واسعة لممثلين عن الحكومة وأحزاب المعارضة وعدد من الشخصيات الاقتصادية والخبراء حيث قدموا آراءهم في المسألة.
وقال محمد الغرياني، الأمين العام للتجمع الدستوري الديمقراطي الحاكم، "إنه لا توجد عصا سحرية لحل معضلة البطالة لكن الخيارات الاقتصادية التونسية نجحت في تقليص نسبة البطالة بنقطتين".
ودعا منذر ثابت أمين عام الحزب الاجتماعي التحرري إلى بعث صندوق وطني للبطالة. وأكد المنجي الخماسي أمين عام "حزب الخضر" أن جهات الشمال الغربي والجنوب فيها أكبر نسب بطالة رغم ما يمكن إحداثه من مشاريع بيئية، ودعا لإعطاء المشاريع البيئية الأولوية المطلقة.
وقال الدكتور مصطفى بن جعفر ممثل التكتل الديمقراطي من أجل العمل والحريات "يجب ألا يخلو تشخيص قضية التشغيل من الجرأة خلافا للخطاب الخشبي الذي عودتنا عليه وسائل الإعلام الرسمية".
وتمنت هدى بن صالح وعمرها 32 سنة، أن ترى نتائج ملموسة من الوزراء والساسة الحكوميين.
وقالت "أتمنى ألا تكون هذه التوصيات مجرد حبر على ورق".
التعليق:
السادة الوزراء الى يتحدثوا على البطالة ينسو ان المعظلة الحقيقية هي الشفافية بربي كيفاش واحد يتخرج السنا يلقى خدمة و واحد عندو 8 سنين بطال اشنوة المقاس قالولنا الكاباس انا انقوللهم راهي الكاباس كذبة كبيرة و هي مجرد شماعة باش يعدوا بيها اقاربها و الناس الواصلين و الى ينجموا يدفعوا لفلان و علان في بالهم التوانسا موش فاهمين الطرح و خاصة وزارة التربية الى تفشت فيها حكاية الرشوة. ولو كان يتفتح تحقيق جدي و نزيه تو تشوفو الثروات الطائلة الى جمعها ناس معينين من اصحاب النفوذ و هوذا لازم باش يجي نهار و يتحاكموا ما ثمة حتى شيئ بلاش. يحدثوا فينا على الوطنية و حب الوطن و هم يخربوا في الوطن بالله ثماش واحد منهم ولادوا يقراو في تونس مع اولاد الشعب المزمر و هم كل مرة يطلعولنا بقرارات ما عندها لا راس و لا بعسوس قالك اشنوة هذاك هو القانون بربي قولولي اشنوة معناها يدخلوا في الناس تخدم ا م س ا موش الصادق القربي بيدو قال راهي الكاباس هي الكل في الكل موش هذا شي يجنن انا نحب نعرف قداش من واحد دخل للتعليم بصيغة ا م س ا و قداش خذاو على كل واحد. لانو عيب ان يكون حاميها حراميها . اشكون الوطني بالحق الشباب البطالة الى تاكلولهم في حقوقهم و تفكولهم في فلوسهم و الا انتم الوزرا الى تبعثوا في ولادكم يقروا البرا من اموال الشعب و يجو من بعد تخدموهم من غير تعب في الوزارات و مؤسسات و الا تحلولهم مشاريع بالفلوس متع الرشوة.الى ان يجاوبوا الوزراء التوانسا على ه المعظلة الكبيرة احنا الشباب المقهور هانا قاعدين اندبروا في حرقة باش انخلولهم البلاد و ما فيها اكذبوا على الناس كيما تحبوا اما اداكدوا راهو ما يصدقكم حد. الناس الكل فايقة بالرواند متاعكم و حتى كان صفقولكم راهو من القهر و الظلم اش ينجم يعمل المذبوح اما خير يصفق على الاقل تعطوه هيكة المنحة متع السي في بي و الا يقعد بلاش و بالمناسبة كان من المفروض باش ناخذوا المنحة متع البطالة و جواب باش نعدوا بيه لاقدر الله واحد يمرض اش يعمل منين جاه باش يمشي للكلينيك و زادا وسعو بالكم واعطونا ابونومون في الكار الصفراء خير من لتعملو في اجتمعات و ما تخرجو بحتى شي.

دولة العسكر

قبل في عهد الاستعمار الفرنساوي كي كانو يهرسو فينا مكانش الامر مستغرب على خاطر هوذمكا اعداء جاو يفكولنا في ارضنا و يهزولنا في خيراتنا اما يا رسول الله تو بعد ما جابلنا بورقيبة الله يرحمو الاستقلال و ولينا دولة قائمة الذات يسير فينا ه الدمار هذا و بالله العظيم اكثر من الاستعمار ناس يفشخو فيها في الطريق العام قدام الناس الكل قالك اشنوة حب يدخل اتحاد الشغل باش يساند جماعة المناجم.

ماهو جماعة النقابات عملو مبادرة يعطيهم الصحة و يظهرلي سي عبد السلام مباركها اما تحت التحت عاد استدعو الناس الكل باش ينظمو ندوة يحسسو فيها بالوضع في قفصة و يطالبوا باطلاق سراح المرابيط متع المناجم من الصبح و البلاد معسكرة كاني حالة طوارئ و خوكم الساخر ما عندوش علاقة في الحقيقة بها الحكايات اما حب يراقب الوضع.
انا في الاول قلت بيني و بين روحي ثمة جماعة يحضروا لعملية ارهابية كبيرة و ممكن يكون خذاو التعليمات من بن لادن بيدو ممكن الكوليزي و الا البالمريوم مستهدف و الا ممكن وزارة الداخلية مرا وحدة على خاطر انواع البوليس الكل موجود، خلي عاد السيفيل مالين الدنيا و هوما عاملين رواحهم بوليس سياسي و سري و هوما مفضوحين الناس الكل عارفينهم مشلقين عيني عينك. يحاوزو في العباد من نهج لنهج و سركلو الاتحاد كانو متع دين والديهم و هم عاملين فيها رمبو في زمانه . جات في ذهني برشا تساؤلات كي ريتهم شادين راجل كبير منعوه من الدخول و يكفرو عليه في ربي و كلام زايد موش ممكن يطلع من فم بشر مسلم الحاصيلو ربي يهبطو فيه تهبيط من بين التساؤلات الى حبيت نطرحها على بعض العلماء و المتفقهين في الدين ياخي الجهاد في ه الناس هوذم حلال و الا حرام. يستعملو في عضلاتهم و يخلصوا فيهم باش يتعداو على المواطنين و يسبوا الجلالة اما لو كان جات ثم مشكلة و الا واحد يبيع في الزطلة في حي التضامن زعم يجوه. و الله لا يطبوها تي هوما يخدما مع المجارما و جماعة الزطلة.
المرة الفاتت بنية مسكينة دغروها بسكين وفكولها برطابل و ستوج عيطت على بوليس متعدي حسب روحو ما في بالوش لو كان موش المواطنين هزوها لسبيطار ماتت انا نتصور لو كان تجي حرب الله لا يقدر للبلاد هوذوما باش يتصدو زعما و الا يفلتو بجلودهم و يخلوا اهل البلا في بلاه . تي باين من نفقتو يبين عشاه.
اما الاغرب من هذا الكل انو الاتحاد و خاصة جماعة المركزية ما ردو حتى فعل و كان الامر خاطيهم و الاعتداء على المواطنين وقع في بوركينا فاصو
زعمة ه الضرب و المضروب في الشارع بتعليمات و الا سلوك فردي متع جماعة موش فاهمين سياسة البلاد. تو احنا قادمين على احتفالات بالتغير المبارك و هوما يهرسو في العباد احنا نقولو تو الجاي احسن و تو تتفرهد الامور و هوما زيدين الى قدام. اشنوة يلزمهم تو هاذم انا في راي نخلولهم البلاد و نهجو و الا نعملو عريضة وطنية نطلبو من فرنسا ترجع و خلينا نتقاتلوا احنا و العسكر خير على الاقل هوذمكة قورة اما العسكر هاذا متاعنا من لحمنا و دمنا.
و السلام عليكم.

بلاغ

الساخر يحب ينقل فرحتو لكل التوانسا. تتذكروش هاكة العرعور الحليتو لمدير الوكالة متع الانترنت بعدها مباشرة رجعت مدونتي تظهر في تونس يعني بالعربية رفعوا عليها الحجب و تو ممكن تكملوا اتابعوا الساخر لانو موش باش يسكت على الحكاية لانو يحب بلادو و يحبها تتقدم و كل واحد وطني بالحق لازمو ما يقبلش الذل الى يمارسو فيها بعض ممن حالفهم الحظ و تحطو في مسؤوليات متقدمة.

اليوم خوكم الساخر يحب يلفت الانتباه لمجموعة من الافعال المشينة لا يحبها لا ربي و لا عبدو متعلقة بهوكة الزواولة متع قفصة انا في بالي الرئيس ادخل و اذن باطلاق سراحهم و هاذي خطوة باهية لكن الموش باهي هو انو الناس الى تم اطلاق سراحهم لقاو رواحهم خارج الطرح فقدوا العمل متاعهم منهم جماعة في التعليم و ثمة اشكون في السكك و اخرين في قطاعات مختلفة.

الناس هاذم دخلو للسجن بتهم ملفقة لو كان يعتمد عليها القاضي لازمو يربطهم 5000 عام انا قريت التهم في بالي تابعين هاكة بو ليحية يقولولو بن لادن و كي ثبتت لقيتهم توانسا ابرياء ما عندهم حتى علاقة بالارهاب و المتفجرات كل ما في الامر انهم اعترضوا على نتائج متع مناظرة قالوا راهي دخلوا فيها الكبارت باش يخدموا جماعتهم و الحكاية فيها رشوة و اكتاف و مسني و نمسك قالوا كيفاش احنا ولادنا بطالة و انتومو تجيبوا في ناس من الساحل باش يخدمو و هنا انحب نقول كليمة راهمو كي ما قبلوش الوضع موش معناها هوما يكرهو السواحلية لا بالعكس اهل الجنوب يحبوا كل حبة رمل من تونس.

تي ياخي كي خرجتوهم من الحبس و بطلتوهم من خدمهم ماهو رجعوهم للحبس خير على الاقل الراقو موجود و بلاش.

في اخر ه التدوينة الصغيرة بربي فكو عليكم من الكراهية للعباد راهو عيب الى تعملو فيه كل مرة طالعين لينا بطلعة و اتعبوا في الرئيس يدخل في كل مرة و يحل المشاكل و البلابز متعكم يا خي كي ما تقدوش رواحكم سيبو الكراسي القاعدين عليها و يزيكم ما غرفتو.

ربي يهدي عبادو

حوار* مع السيد محمد بن عامر مدير الوكالة التونسية للانترنت.

البارح بعد ما كتبت تدوينة صغيرة على الفساد في البلاد و دعيت الحقوقيين باش يرفعوا قضية بكل المتورطين في الرشوة و السرقة و بعد ما نشرتها بسويعة كلمت اصدقائي باش يطلعوا عليها و يعطوني رايهم و تعليقاتهم قالولي راهي مدونتك مسكرة و ما انجموش ندخلولها كان بالبروكسي و ه الامر المشين في الحقيقة غششني برشا و بما اني مواطن صالح ما مشيتش نكتب في بيانات التنديد بالحكومة و الوزراء بل مشيت لدليل الهاتف و طلبت البرطابل متع سي محمد بن عامر المسؤول الاول على الانترنت في بلادنا الى نحبوها و نغيرو عليها، طلبتو باش نستفسر من الحكاية. الحاصيلو ما انطولش عليكم بمجرد ما رن التليفون متاعو و عرف الموضوع قالي علق انت مواطن مزمر هاني تو نطلبك انا من تليفون الخدمة و كيما تعرفو الكل تليفون الخدمة رزق البيليك ما فيها باس يطلبني منو. و كي طلبني دار بيناتنا ه الحوار هاني باش ننقلهولكم بكل امانة.

- الساخر: يا سي محمد سامحني راني منيش فاهم علاش حجبتولي المدونة متاعي ياخي انا اش قلت فيها ماهو حديث متع الناس الكل و انا حبيت انبلغ ما نسمع فيه للمسؤولين الكبار و ربما رئيس الدولة بيدو يقراه و ياخذ فيه قرارات باهية. انا ما كتبتش على الارهاب و الا دعيت للمظاهرات ضد الفساد و المفسدين.

سي محمد: صدقني يا خويا الساخر الوكالة متاعنا ما عندها حتى دخل احنا ما انسنصرو كان مواقع السكس لانها تتنافى مع اخلاقنا الاسلامية اما حكاية المدونات و المواقع الاخرى المحجوبة راهو موش منا احنا.

- الساخر: زعمة تكونش من الكونكسيون ضعيفة و برا و كان تظهر من الكونكسيون قولولنا خلينا بكلنا نبدل التدفق العالي متع 2 ميقا و الخليف على الله.

- سي محمد: لا يا الساخر موش مشكل كونكسيون احنا بلادنا لو قارنها بالجيران متقدمين برشا و قاعدين نطوروا في خدمات الانترنت و قريبا باش يولي كل بيت فيه انترنت.

- الساخر: تو بربي يا سي محمد انا اشنوة دخلي انتم قاعدين تخدموا و الا راقدين و اش نعملو بالانترنت في كل بيت و المدونات الى تقول في الحقيقة مسكرينهم ياخي تحبوا تاخذوا الفلوس و برا هذا راهو عيب و ما يجيش كي ما تحبوش التوانسا يبحروا في الانترنت علاش تعملو في الاشهار النهار الكل و علاش تونس تحتضن في قمة المعلومات و علاش تنخرطوا في العولمة.

- سي محمد: بالله خويا الساخر ما تتغششش هاني باش انفهمك في القصة الكل و خليه الكلام بيناتنا.

- الساخر: اتهنا سرك في بير

- سي محمد: احنا في الوكالة مسؤولين على نشر الثقافة الرقمية و موش من صالحنا حجب المواقع و المدونات بالعكس يا الساخر انا و الله ما نرقد اليل الاما نقرا تونس نيوز و موقع النهضة و جريدة البوكت و متع نجيب الشابي و مجلة كلمة قبل ما يسنصروها وبيديت نعمل في كيف على التدوينات متعك و راني انا بيدي كيف التوانسا الكل كي يقصوا عليا ندبر بروكسي ندخل بيه و ديما ماشيا.

- الساخر: تو انت اثبتلي انك متعاطف مع قضيتي اما ما قتليش اشكون يسنصر في المدونات راني باش نعمل كي زياد الهاني و هاك المحامي الكريشي و نرفع قضية و ما نحبش نحرجك انت نحب نعرف منهو بالضبط القاعد يحجب في المدونات.

- سي ع محمد: يا ساخر احمد ربي انت حجبولك مدونتك امالا اش تقول على المدونات الى مسحوها مرا وحدة مسكينة ام زياد و الله كاني ماتلها ولدها يبعد عليه الشر كي قصولهم كلمة و المدونة متع الفوراتي و خالد الكريشي و غيرهم بالمئات ، انا نحبك تقتنع انو احنا خاطين اما هاني باش انقلك سر اخر و احفظوا

- الساخر: اتهنا سي محمد

- سي محمد: عامين التالي جابو لوجيسيال من اسرائيل مهمتو مراقبة المدونات و حجبها و أي مدونة ما تعجبش سياسة الدولة يقع حجبها او محوها .

- الساخر: تو انت سي محمد ديما تتحدث على المجهول اشكون بالضبط هاذا الى قاعد يحجب.

- سي محمد: خلينا بربي خويا الساخر انا راني صباب ماء على اليدين ما تقولش محمد بن عامر تحل في الحديث هذي راهي اسرار كبيرة متع امن الدولة اخطاني خويا خليني ناكل خبزة مع من كلا انا منيش مستعد نتشرد.

- الساخر: يا خي انا اش قلت باهي موش مشكل ما تقليش اشكون هاني عرفت تو اما موش لو كان اللوجيسيال الى دفعوا فيه رزة فلوس مشاو عملو بيها مشاريع خليها العباد تخدم خير خايفين من الكلام يا رسول الله. انا هاني ماشي نشكي للرئيس بيدو انتوما ماعادش توكلو الخبز ما بيدكم شي و سامحني خويا محمد على الازعاج انا راني منرفز برشا على المدونة متاعي و بارك الله فيك انت كي سمعتني و طلبتني من عندك.

- سي محمد: لا موش مشكل سي الساخر انت باين فيك انسان متربي و احنا ديما في خدمة المواطن اطلبني في أي وقت نجاوب خويا.

علقت التليفون و انا محتار و حاير في امر البشرية كيفاش سيبوا مشاكل البلاد و يتبعوا فينا على جرد مدونة.

و لنا عودة

* الحوار مع مدير الوكالة افتراضي

تونس تحارب الفساد

حاجة ما كنتش نعرفها من قبل عرفتها البارح برك، اضراهي بلادنا مصادقة على اتفاقية الامم المتحدة لمكافحة الفساد تي هاي حاجة هايلة خلاص وزعم اشكونهم الفساد الى باش تكافحهم تونس و تحل في شانهم تحقيق جدي وفوري زعمة يوصلو للروس الكبيرة و الا كي كل مرة يعمل كبش فداء كيف اوخينا متع اتحاد الشغل طلعوه سارق المليارت بعد ما كلاو معها لين شبعوا.

زعمة موش ممكن يوقفوا الرجال بالحق و يقرر الرئيس بيدو فتح تحقيق في جملة من التشكيات متع المواطنين. الى فكولو ارضوا و الى تحيلو عليه و نحولو فلوسوا و الى دخلوهم للحبس بتهم ملفقة و قالوا خوانجية و غيره من هاكة الاوي...
المهم انا نتوجه للحقوقيين و المحاميين و هيك المنضمات الى قالوا راهي متع المجتمع المدني باش تاقف وقفة صحيحة و ترفع قضية لدى الامم المتحدة في ه العباد الفساد هوذم الى كلوا فلوسنا و حطمولنا مستقبلنا و ما يبقاوش انهار الكل و هم يسبوا في فلان و علان و جماعة فلان بيهم و جماعة علان عليهم. يا اخي اتحركوا بشكل قانوني و خاصة انتم عندكم مجال للحركة في الداخل و الخارج و موش مشكل كان قالوا هاذا استقواء بالاجنبي و ما هو معروف تو يجي بسيس يكتب مقال في الصباح و يضرب عليه رزة فلوس و الا هاكة التافه بن نصيب موش مشكل خليهم يسبوا كلب ينبح على طيارة هوما يعرفوا انهم مجرد عساسة و يدبروا في روسهم و يلزمهم يبرروا الفساد و يدافعوا على المفسدين اما انتم يارسول الله واحد كيما بشير الصيد محامي معترف بيه و مقتدر و هو تو عميد المحامين اشبيه ما يرفعش قضية بالفاسدين و الا سي حمة الهمامي علاش ما تجمعوش كلمتكم كيما عملتو في 18 اكتوبر تعملولنا حويجة اخرى على الفساد.
راهو تحرك من ه النوع مهم برشا باش المواطن العادي ما يقولش هوذا جماعة دون يسبوا في الرئيس و ما عندهمش برنامج حقيقي لازمك تاقفوا ضد الفساد و تفضحوا المفسدين و هاككة المواطن يحس انو ثمة اشكون يدافع عليه قدام الهجمة الشرسة متع المافيا.
فالك وزير التربية سي حاتم بن سالم من نهارين عمل اجتماع و اعلن على تشكيل لجنة مهمة متابعة الغيابات متع الاساتذة و التلامذة. بالحق راهو كي يغيبوا الاساتذة بلا حتى مبرر هذا يعتبر فساد و يلزم يوقفوهم عند حدهم لكن الحاجة الباهية زادا انو سي حاتم قال راهو الاستاذ هو محور العملية التربوية و ه الكليمة ما سمعنهاش خلاص في عهد القربي الى هو بيدو متهم بالفساد و قالوا راهو يخدم في جماعة خنيس بودنا سي حاتم يعمل لجنة اخرى تحقق في ه الدعاوي و ما فيها باس راهو كي يقولولنا راهو الصادق القربي فاسد و يعاقبوه على الاقل الواحد يشعر انو ثمة امان اما كل مرة يجينا حد يعمل شاطح باطح و يمشي راهو موش باهي لسمعة بلادنا السيرة على درب الشفافية و العدالة و السيد الرئيس قال ما يتظلم حد في بلادي و ما فيها باس زاد سي حاتم يتعاون مع النقابة و يكملولنا النظام الاساسي راهو عيب اساتذة ما عندهمش ستاتي و زادا يعمل لجنة اخرى تنظر في هيكة النقل التعسفية متع 97 استاذ الى شتتهم القربي قالك اشنوة ماهمش في التجمع ياخي ما يعيش في البلاد كان التجمعيين؟ و بربي سا سي حاتم ما تنساش هيكة الفضيحة متع القربي المتعلقة بطرد 3 اساتذة بلا حد تبرير راهي وصمة عار في جبين وزارة التربية و فعل لا يحبها لا ربي و لا العبد ما فيها باس تقول سلفنا اخطا و هانا باش انرجعوا الحق لصاحبو و رد بالك تعمل كيفو كل مرة يقول راهي مشكلة تتجاوزني احنا نحبو يكون عندنا وزرة بالفم و الملا موش عسكر كردونة دون يصححوا في الورق متع خليان البيوت. وريينا مريرة وحدة انا عايشين في ظل دولة موش قبيلة و الا عشيرة. و رييونا مريرة وحدة انو البلاد فيها قانون.
و السلام عليكم.

تعليق على اجتماع الحكومة و المعارضة حول البطالة

قالك يا سيدك بن سيدك وقع اجتماع كبيرة في العاصمة، الحكومة قالت راهو مؤتمر مرة واحدة المهم حكو فيه على مشكلة البطالة و حضر فيه الروس الكبيرة الكل موش كان متع الحزب برك لالا المرة هذي حتى بن جعفر و هاكة متع النباتات و الهواء النقي قال كلمتو. و حضر زادا واحد ليبرالي تحرري يقولولو منذر ثابت و بالمناسبة هو كي كان يقرا كان ثوري برشا و كان اشتراكي كان يقول لماركس اتكلم و الا خليني نتكلم . بالطبيعة على خاطر البطالة عدو كبير للمجتمعات و خاصة الشباب و الرئيس قال الشباب هو الحل على هذاكة جاء الوزير الاول و سي الغرياني و غيرهم و حتى بعض الشباب الحاضرين عطاوهم الكلمة و عبروا على رايهم بكل شفافية، املا لا راني في دولة القانون و المؤسسات احنا و الديمقراطية ضاربة اطنابها. اشبيه هاني نحكي انا تو بكل حرية و نكتب على الوزرة و نقول اشنوة الي عجبني و اشنوة الي ما عجبنيش. على هذاكة نطاب من الناس الى حضرو باش ما يتغششوش من بقية الحديث.

السادة الوزراء الى يتحدثوا على البطالة ينسو ان المعظلة الحقيقية هي الشفافية بربي كيفاش واحد يتخرج السنا يلقى خدمة و واحد عندو 8 سنين بطال اشنوة المقياس قالولنا الكاباس انا انقوللهم راهي الكاباس كذبة كبيرة و هي مجرد شماعة باش يعدوا بيها اقاربهم و الناس الواصلين و الى ينجموا يدفعوا لفلان و علان في بالهم التوانسا موش فاهمين الطرح و خاصة وزارة التربية الى تفشت فيها حكاية الرشوة. ولو كان يتفتح تحقيق جدي و نزيه تو تشوفو الثروات الطائلة الى جمعها ناس معينين من اصحاب النفوذ و هوذا لازم باش يجي نهار و يتحاكموا ما ثمة حتى شيئ بلاش. يحدثوا فينا على الوطنية و حب الوطن و هم يخربوا في الوطن بالله ثماش واحد منهم ولادوا يقراو في تونس مع اولاد الشعب المزمر و هم كل مرة يطلعولنا بقرارات ما عندها لا راس و لا بعصوس قالك اشنوة هذاك هو القانون بربي قولولي اشنوة معناها يدخلوا في الناس تخدم ا م س ا موش الصادق القربي بيدو قال راهي الكاباس هي الكل في الكل موش هذا شي يجنن انا نحب نعرف قداش من واحد دخل للتعليم بصيغة ا م س ا و قداش خذاو على كل واحد. لانو عيب ان يكون حاميها حراميها . اشكون الوطني بالحق الشباب البطالة الى تاكلولهم في حقوقهم و تفكولهم في فلوسهم و الا انتم الوزرا الى تبعثوا في ولادكم يقروا البرا من اموال الشعب و يجو من بعد تخدموهم من غير تعب في الوزارات و مؤسسات و الا تحلولهم مشاريع بالفلوس متع الرشوة.الى ان يجاوبوا الوزراء التوانسا على ه المعظلة الكبيرة احنا الشباب المقهور هانا قاعدين اندبروا في حرقة باش انخلولهم البلاد و ما فيها اكذبوا على الناس كيما تحبوا اما اتاكدوا راهو ما يصدقكم حد. الناس الكل فايقة بالرواند متاعكم و حتى كان صفقولكم راهو من القهر و الظلم اش ينجم يعمل المذبوح اما خير يصفق على الاقل تعطوه هيكة المنحة متع السي في بي و الا يقعد بلاش و بالمناسبة كان من المفروض باش ناخذوا المنحة متع البطالة و جواب باش نعدوا بيه لاقدر الله واحد يمرض اش يعمل منين جاه باش يمشي للكلينيك و زادا وسعو بالكم واعطونا ابونومون في الكار الصفراء خير من لتعملو في اجتمعات و ما تخرجو بحتى شي.

باش تطلعوا على الاجتماع و الفعاليات متاعو هاوكة الرابط و الى ما عندو شاهد كذاب

http://www.magharebia.com/cocoon/awi/xhtml1/ar/features/awi/features/2008/10/12/feature-01

الكذب و البلادة

اليوم في تونس ما تسمع كان الكذب و البلادة و الكذب هذايا موش كان من المواطن العادي إلي يحب يدبر راسو، لا بالعكس اليوم الكل يكذبو بداية من المسؤولين الكبار حتى لقناة تونس ضبعة، و بالمناسبة و كان باش اندخلو حديث في حديث هاك القناة إلي ما يتفرج فيها حد و كل مرة وين تجينا ورقة الضو يجي معاها معلوم الإذاعة و التلفزة بربي هكة موش العالم الكل يكذب على بعضو أحنا ما نتفرجو كان في الجزيرة خايف لمرة يكلمنا الشيخ متع قطر و يقول أدفعو ماكم تتفرجو في القناة متاعي.
نرجعو للكذب متع المسؤولين و سامحوني كان طولت عليكم. هاك المرة نتفرج مع الوالد في برنامج عالتشغيل فز وزير قال تونس ما فيهاش بطالة و كل شاب يحب يخدم ينجم يندمج في المجتمع. الوزير حب يبلغ فكرة أنو الشباب سنك سنك (5/5) حد ما محتاج و بكلنا نسكنو في المنازه و المنارات و نركبو في التيس و التكسيات.
قام الوالد متغشش أنا في بالي اكتشف أنو الوزير يكذب و دار بيناتنا هالحوار حبيت ننقلهولكم كيما هو و احكموا وحدكم:
الوالد: وليدي أشبيك ما تحبش تخدم
آنا: ساكت
الوالد: حاقرني يا ولد الكلب
آنا: لا علاش بابا آش ثمة؟!! فين باش نخدم؟!!
الوالد: ماكش تسمع في السيد الوزير!!!
آنا: لا يا بابا راهو كذب في كذب
الوالد: ياخي انت تعرف أكثر من الوزير قاري قداش من عام و مكلفو الرئيس باش يحل المشاكل تقول انت يكذب!!!
آنا: (الحاصيلو بديت انسلك فيها و آنا خايف لا يقص عليا هاك الدينارين إلى يعطيهملي كل صباح) لا موش قصدي راهو الوزير هذا جديد ما في بالوش بينا أحنا جماعة المتريز ما انجمو نخدمو كان في التعليم و هو يحب يدبرلنا خدم في الشركات.
الوالد: اخدم في الشركات حتى لين تجي الخدمة الرسمية.
آنا : بالله أش باش نخدم آنا عندي متريز تاريخ يا خي في الشريكة باش انقري الموظفين عالحرب العالمية الثانية.
الوالد: زيد اتلغبج و قول الدولة ما تحبش الشباب.
آنا: باهي يا بابا هاني تو غدوة نمشي أنشوف الحكاية و نقدم مطلب و انشا الله يقبلوني.
الوالد: هانو رقم التليفون مقيد متع البرنامج قيدو و احرص على روحك راهو عمرك مشا.
و آنا كيف العزوزا الى شدت سارق عرفت الي الرقم موش باش يرد و ديما أوكيبي قيتو و قتلو.
آنا: هاني باش نطلبهم تو من تليفوني.
آنا نطلب و هو مشغول مشغول حتى وين كمل البرنامج
آنا: شفت باب الرقم مشغول و تو تسكر.
الوالد: انت ديما مسكرا في وجهك يا ولدي حرك على روحك و شوف أمورك هو ولد حمد جارنا دخل يقري قالولي يعرف مسؤول مسو بحويجا و دبرلو خدمة شوف تلقاش انت حد يدخلك نعطوه حويجا و خليه يتوسطلك.
آنا: يا بابا هذي اسمها رشوة
الوالد: أش نعمل مالا نبقا انعاني فيك طول حياتي.
آنا: لا تعانينا لا شي هاني باش اندبر كنترا في ايطاليا و ماشي على روحي
الوالد: برا المهم ترجع راجل
آنا: باهي بابا ما تتغشش راهي البلاد الكل مسكرا و حد ما مرتاح.
الحاصيلو ورطني هاك الوزير بالكذب متعو زعمة رصاتلي بايت البرا لو كان موش شوية تكمبيص. الله يهديك يا وزير و يهدي كل الوزرا الكذابة كيفك.